TAEC na Jeshi la Polisi Wamesaini Muendelezo wa Makubaliano ya Kuendelea Kuimarisha Ulinzi na Usalama wa Vyanzo vya Mionzi Nchini

Jun 11, 2022

Tume ya Nguvu za Atomiki Tanzania (TAEC) na Jeshi la Polisi leo Juni 10, 2022 wamesaini  muendelezo wa mkataba wa makubaliano ya  ushirikiano wa ulinzi na usalama wa vyanzo vya mionzi hapa nchini.

Makubaliano hayo  yanalenga kuhakikisha kuwa Jeshi la Polisi  linatoa ulinzi wakati wa usafirishaji wa vyanzo vya mionzi pamoja na kuhakikisha ulinzi wa  vituo vinavyofungiwa kutumia vyanzo vya mionzi kutokana na sababu za ukiukwaji wa sheria na taratibu za matumizi salama ya mionzi hapa nchini.

Lengo kuu ni kuendelea kuimarisha ulinzi na usalama wa vyanzo vya mionzi nchini na  kuepusha vyanzo hivyo kuangukia kwenye  mikono isiyo salama na kutumika  vibaya katika matukio ya kihalifu/kigaidi na kuleta taharuki katika jamii

Makubaliano  haya yametiwa saini na Kamishna wa Operesheni na Mafunzo ya Jeshi la Polisi Ndugu Liberatus Sabas aliyekuwa ameambatana na viongozi wakuu wa Jeshi la Polisi SACP Justus Kamugisha, ACP Marisone Mwakyoma na ACP Mary Kipesha kwa niaba ya Inspekta Jenerali wa Jeshi la Polisi (IGP) nchini.

Kwa upande wa TAEC mkataba huo ulisainiwa na Kaimu Mkurugenzi Mkuu Dkt. Justine Ngaile aliyekuwa akimuwakilisha Profesa Lazaro Busagala, Mkurugenzi Mkuu wa Tume ya Nguvu za Atomiki Tanzania