TAEC Yaendesha Mafunzo ya Kitaifa ya Usalama wa Mionzi Jijini Arusha

TAEC Yaendesha Mafunzo ya Kitaifa ya Usalama wa Mionzi Jijini Arusha

Arusha,Tanzania—25 Agosti 2025
Tume ya Nguvu za Atomu Tanzania (TAEC) inaendesha mafunzo ya kitaifa ya siku tano kuhusu ulinzi na usalama wa mionzi kwa watumiaji wa vifaa vya kupimia mionzi (nuclear gauges). Mafunzo haya yameanza rasmi leo, Jumatatu tarehe 25 Agosti 2025, katika ofisi za TAEC za Kanda ya Kaskazini jijini Arusha, yakihusisha washiriki kutoka sekta mbalimbali zikiwemo viwanda vya vinywaji, migodi, ujenzi wa barabara, na kampuni ya SGS Tanzania—ambayo ni miongoni mwa kampuni zinazoongoza katika ukaguzi, uthibitishaji, na upimaji wa viwango.

Mafunzo haya yalifunguliwa rasmi na Dkt. Denis Mwalongo, Mkuu wa Kanda ya Kaskazini, aliyemwakilisha Mkurugenzi Mkuu wa TAEC, Prof. Najat Kassim Mohammed.

Katika hotuba yake, Dkt. Mwalongo alisisitiza umuhimu wa usalama wa mionzi katika kulinda wafanyakazi, wananchi na mazingira. Alieleza kuwa mafunzo haya ni sehemu ya juhudi za TAEC katika kujenga uwezo wa kitaifa wa matumizi salama ya teknolojia ya nyuklia.

“Mafunzo haya siyo tu kwa ajili ya kufuata sheria, bali ni kwa ajili ya kujenga utamaduni wa uwajibikaji na uelewa miongoni mwa wataalamu wanaofanya kazi na vifaa vinavyotoa mionzi,” alisema Dkt. Mwalongo.

Mafunzo haya yanajumuisha mada mbalimbali za kitaalamu na za vitendo, zikiwemo: Utangulizi wa mionzi ya ayonisha, Vipimo na viwango vya mionzi, Matumizi ya teknolojia ya nyuklia, Madhara ya mionzi kwa afya ya binadamu, Kanuni za ulinzi dhidi ya mionzi, Mfumo wa kisheria nchini Tanzania, Majukumu ya Maafisa Usalama wa Mionzi (RSOs), Ulinzi wa wafanyakazi dhidi ya mionzi, Aina za vifaa vya nyuklia na vifaa vya kugundua mionzi, Mahitaji ya usalama kwa vifaa vya kupimia mionzi, Matengenezo na ukarabati wa vifaa vya mionzi, Usalama wa nyuklia na udhibiti wa usafirishaji haramu naTaarifa kuhusu ajali za mionzi

Washiriki pia watapata fursa ya kutembelea maabara na kushiriki katika mafunzo ya vitendo ili kuimarisha uelewa wao wa kiutendaji.

Mafunzo haya yanalenga kuongeza uelewa, kuboresha maarifa ya kiufundi, na kuhimiza matumizi salama ya vifaa vinavyohusisha mionzi katika maeneo ya kazi. Kufikia mwisho wa mafunzo, washiriki wanatarajiwa kuonyesha uelewa wa kina kuhusu hatari za mionzi na mbinu za kuzidhibiti.

Mafunzo yatahitimishwa siku ya Ijumaa, tarehe 29 Agosti 2025, kwa hafla ya kukabidhi vyeti kwa washiriki.

TAEC inaendelea kuwa chombo muhimu katika kusimamia na kuhamasisha matumizi salama ya teknolojia ya nyuklia nchini Tanzania, kwa kuzingatia viwango vya kimataifa na malengo ya maendeleo ya taifa.