TANZANIA YAZINDUA PROGRAMU MPYA ZA FIZIKIA TIBA KWA MARA YA KWANZA NCHINI

Dar es Salaam, Tanzania

Katibu Mkuu wa Wizara ya Elimu, Sayansi na Teknolojia, Prof. Carolyne Ignatus Nombo, amesema kuwa ushirikiano kati ya Tanzania na Shirika la Kimataifa la Nishati ya Atomiki (IAEA) umewezesha wataalamu wengi wa Kitanzania kupata mafunzo nje ya nchi katika fani ya sayansi na teknolojia ya nyuklia, jambo ambalo limechangia kwa kiasi kikubwa maendeleo ya sekta hiyo nchini.

 

Prof. Nombo alitoa kauli hiyo jijini Dar es Salaam, katika Chuo Kikuu cha Dar es Salaam (UDSM), wakati wa uzinduzi rasmi wa programu mbili mpya za kitaaluma:

• Shahada ya Sayansi katika Fizikia Tiba
• Shahada ya Umahiri ya Sayansi katika Fizikia Tiba

Programu hizi zimeanzishwa kwa mara ya kwanza nchini Tanzania, zikiwa na lengo la kuwafundisha wataalamu wenye uwezo wa kutoa huduma za kitabibu na kuendesha mashine zinazotumia teknolojia ya nyuklia kwa usahihi na usalama.

 

Aidha, Prof. Nombo alieleza kuwa wanafunzi watakaojiunga na programu hizi watapata mafunzo kwa vitendo katika Taasisi ya Saratani ya Ocean Road (ORCI) jijini Dar es Salaam, jambo litakaloongeza uzoefu wao wa moja kwa moja katika fani husika. Kabla ya kuanzishwa kwa programu hizi, wanafunzi wa Kitanzania walilazimika kusafiri kwenda nchi kama Ghana, Afrika Kusini, Misri na Italia ili kupata mafunzo ya aina hiyo.

 

Kwa upande wake, Mkurugenzi Mkuu wa Tume ya Nguvu za Atomu Tanzania (TAEC), Prof. Najat Kassim Mohammed, alisema kuwa Tanzania inaendelea kuwekeza katika huduma za matibabu ya saratani. Kwa sasa, hospitali mbili za umma zinatoa huduma hizo, huku hospitali nyingine nne zikiwa katika hatua mbalimbali za maendeleo ili kutoa huduma kama hizo. Ukuaji huu umeongeza mahitaji ya wataalamu wa fizikia tiba nchini.

 

Prof. Najat alisisitiza kuwa TAEC itashirikiana kwa karibu na Chuo Kikuu cha Dar es Salaam, Taasisi ya Ocean Road, na IAEA ili kuhakikisha utekelezaji wa mafanikio wa programu hizi muhimu.

Wakati huo huo, Naibu Makamu Mkuu wa Chuo Kikuu cha Dar es Salaam anayeshughulikia Utafiti, Prof. Nelson Boniface, alieleza kuwa uzinduzi wa programu hizo ni wa wakati muafaka, kwani chuo kiko katika mchakato wa kupitia na kuboresha programu zake za kitaaluma ili ziendane na mahitaji ya jamii ya sasa.

 

Aidha, Mkurugenzi Mtendaji wa Taasisi ya Saratani ya Ocean Road, Dkt. Diwani Msemo, alisema kuwa programu hizo mpya zitawanufaisha sana wananchi kwa kuhakikisha upatikanaji wa huduma kwa wakati na kuchochea maendeleo ya taifa katika sekta za afya na sayansi ya nyuklia.